Princess Katarina's letter to Gustav Adolf, dated August 26/September 5 (Old Style), 1632

Source:

Riksarkivet, page 149 in Pfalz, Catharina; Gustav II Adolf; Skrivelser till konungen

https://sok.riksarkivet.se/nad?postid=Arkis+8cb4d977-9b89-11d5-a701-0002440207bb&s=Balder

The letter:

Grosmechtiger könig freundtlicher hochgeherter, hertz vilgeliebter herr bruder weil mir diß gelegenheit wider zu felt hab ich mein schuldigkeit nach nicht vmbgehn können E K M mitt ein klein briflein zu ersuchen, weiln ich stes so Ein hertzlich verlangen trag E M gutte zustandt zu Erfaren, wünsche zu dem almechtigen getrewen gott Er wolle E K M mitt alle dero angehörige beij gesundem weßen gefristen laßen, daß sie sig vndt Victorie vber alle dero feinde haben möchten, auff daß ich alzeit fröliche zeitungen von dero semptliche erlangen möge vnder deßen aber Eh ich sölche gutte bottschafft bekome lebt mein hertz wol in Engsten, dem danck, dem liben gott der E M bißher so wunderbarlich beijgestanden hatt den selbige ruff ich auß grundt mein hertzen an der wolle E M ferner beijsten daß dero öfentliche vndt heimliche feinde zu schanden werden möchten, auff daß E M mitt glücke vndt frewden, mitt dero gantze comitat wider in dero vatterlandt kommen, vnderdeßen verlangt vns hertzlich nach die glückliche zeit, hir sol E K M gott lob alles nach im gutte[n] stat wißen ir L die prinsesin ist, itz zimlich wol, die dag ist ir L wol am husten vndt schnufen Etwaß vbel auff geweßen, den Eß geht sehr hir beij vns allen vmb, Eß hatt sich aber gott lob balt gebeßert, gott laß ir L ferner zu volkommer beßerung kommen vndt verhütte gnediglich weitter alle Kranckheit, ir L nimbt gott lob in allen gutten zu, vndt kan fein schon buch pawiren (?), E M werden sich balt numehr bedencken müßen waß sie für ein presepter haben sol, ir L verlangen sehr nach E M beijde, gott Erfrewe ir L vndt vns allen mitt E M glückliche widerkunft vnder deßen bitt E M ich sie wollen allezeit mich vndt die meinigen in dero herr bruderliches getrewes hertz schliesen, sunderlich vnßer dochter die beij E M ist, bitt E M ich dinstlich sie wollen als dero dochter ir sich laßen befollen sein, in aller vorfalender gelegenheit, den in gottes henden vndt in E M beijde gnad hab ich sie vertrawdt zweiwel nicht sie werden ir vndt alle vnßer kinder bests wißen, als dero getrewste dinern vndt dinerin den waß E M an mich vndt die meinigen Erweißen, daß wirdt gott reichlich gegen dero hoges haus in gnaden reichlich vergelten, vndt wir seindt E M gantz mitt trewen hertzen vndt dinsten obligirt, E M versicher sich daß E M an vertrawn hochgeErte dochter ich, mich zum höchsten wil anbefollen sein laßen ir L mitt trewen hertzen auff zuwarten, befelle nu hie mitt E K M mitt alle dero angehörige in dem schutz gottes zu aller hochger glücklicher wolfart beijde an seel vndt leib, nebest wünschen daß wir allezeit gutte zeitungen von dero semptliche bekommen mögen, verbleijbe hiemitt nu vndt alzeit

E k m

im hertzen gantz

getrewe dinstwilige

swester biß in den

tot etc.

Catharina P S.

datum Stockholm

den 26 Augusti

1632

Above: Kristina.

Above: Gustav Adolf.

Above: Princess Katarina.