Princess Katarina's letter to Gustav Adolf, dated September 6, 1632

Source:

Riksarkivet, page 151 in Pfalz, Catharina; Gustav II Adolf; Skrivelser till konungen

https://sok.riksarkivet.se/nad?postid=Arkis+8cb4d977-9b89-11d5-a701-0002440207bb&s=Balder

The letter:

Grosmechtiger könig freundtlicher hertz vilgeliebter hochgeErter herr bruder ob ich wol neulich E M mitt anders lackeij dißen hieigen zustandt, demühtig hab zu erkenen geben, weil mir nu diß gewiß bottschaff wider zufelt so hab ich aber nicht wollen verbeij gelaßen E M dinstlich mitt meinen schreiben zu Ersuchen, den ich Ein segnlich verlangen trag von E M gutte bottschafft zu haben, gott der almechtige stetz E M in dißen betrübten vndt sweren krigs weßen beij, daß sie derümliche vndt christlige vornemen zu Ein gewünschten Endt bringen mögen auff daß E M mitt dero angehörige in gutter gesundtheit vndt glücklichen zustandt wider in dero vatterlandt kommen möchten, vnder deßen floh ich zu den getrewen gott Er wolle E M mitt sambt alle dero armehe vndt alles waß ir lib ist, fetterlich für allem vnfal, vndt feindtliche prachticke gnedichlich bewahren, vndt daß E M hie haben gelaßen, in gutte wolstandt Erhalten, vndt sol E M gott lob Vndt danck E M hochgeErte dochter die prinsese in guttem zustandt wißen wie zeiger dißer E M alles auß fürlicher berichten kan, ir L neme gott lob in allen gutten zu, den selbigen bitt ich Er wolle reichlich ferner sein gnad vber ir L auß schuten, daß sie möge gott zu Ehren Erwachsen E M zu frewd vnd vns allen zu trost, gott gebe ir L mitt vns allen die frewd daß wir E M mitt frewden wider sehn möchten, so wehr alles gutte mittler weil aber leben die in Engsten die nechst gott aller ir trost zu E M haben, wegen dero langwirigen abweßen, vnder welchen mein h l herr vndt ich gewiß Eine sein, ach gott gebe vns E M ankunft wider. mittler weil bitt E M ich dinst swesterlich sie wollen mich vndt die meinige in dero gnedige herr brüderliches hertz vndt fauor haben, vndt vns im besten gedencken, sich versichern daß wir E M getrewste dinern vndt dinerin sein, vndt daß anvertrawte E M hochgeErte dochter vnß mitt trewen hertzen zum höchsten wollen anbefollen sein laßen, ir L mitt trewe auffzuwarten, gott wolle sein gnad vndt segen zu allem geben, bitt auch dinstlich E M wollen vnßer dochter wo sie noch im leben ist, sich in gnade laßen befollen sein, man hatt mir bericht daß sie sol swerlich krank sein, welches mich wol Engstigt, aber ich befelle ir in gottes hende Er sick daß Eß vnß mühlich vndt seelig ist, in deßen schutz E M vndt alle dero angehörige ich trewlich befelle, der wolle E M vndt alles waß ir lib ist vnder sein vetterlichen wagenbürg halten, vndt versicher ich E M daß ich bin vndt mich bfleisigen werde zu sein

E k M

getrewe demüd

dinstwilige swester

biß in den tot etc.

Catharina P S etc.

datum Stockholm

den 6 Sptember

1632

Casparus hatt mich gebetten: im beij E M zu recomendiren weil Er Ein alter diner ist E M wißen am besten wo zu Er dinlich ist, bitt E M verzeij mich daß E M ich [...]

Above: Kristina.

Above: Gustav Adolf.

Above: Princess Katarina.