Source:
Nya handlingar rörande Skandinaviens historia, volume 27, page 273, Elmén och Granbergs Tryckeri, 1845
The letter:
Monseigneur,
Si J'aj menque de vous escrire plustost la [...] en a este qu'a mon arrivee aupres des miens plusieures affaires m'ont tellement occupe, que je [...] sen avoir un moment a moij, ausi nestois je [...] du lieu ou ma lestre hauroit l'honneur de trouver Vostre Altesse, mais me voissi asteure mon tres cher Maistre pour vous rendre Comte de ce qui c'est passe depuis que j'aj pris conge de vous. Le favorable acqueil que me fist Monsieur le Chancelier & plusieurs discours tres importans & presque tous, au grand aventage de V. A. nous servira un jour d'entretien, c'est pourquoj je commencere seulement de Stokholm, car c'est abuser seulement de la patiense de V. A. deluj faire le resit de la reception que a ma chere moitie & moij fire mes parens. Apres un seiour de quastre iour en ce lieus, ie me suis resolu d'aller a Stokholm pour m'informer de l'Estat de touste schose, comme ausi de ne puoint desobeir aus commendemens de Ma Roijne. Je suis arrive le mesmme iour que je partis d'issi & sur le suoir j'aj faist ma cour, ou j'aj eu le bonheur de baiser les mains de Sa Majesté que j'aj trouve en parfaitte sente plus genereuse & plus sage que iamais. La Roijne prist plaisir a m'entretenir de plusieures schoses tres considerables & des premieres du dessein & du comportement de V. A. Je n'aj puoint eu paine d'i repondre ce qui falloit, estent sur toust instruit. Elle ne desagrea puoint, mais eut paine a croijre ce que j'en disuois, s'oppigniatrent de vous connoistre mieus que moij, et me fist le raport de toust ce qui c'estoit passe, ce que ausi auparavant j'avois apris de mon Pere. Un iour j'en dire à V. A. ce qui cera plus considerable & je vois a plus pres le chemein qu'il faudra tenir. Apres ces discours Elle me protesta avescque des sermens tres sacres, sens que je touchas a cette corde l'intention qu'Elle avoit pour vous & me fist voir dens son coeur l'estime qu'Elle gardoit pour V. A. Ausi me disoit Elle de vouloir enuoyer unne [...] avescque son portrait en petit enferme dens [...] & un austre grand portrait au premier iour, se plaigniant les larmes aus ieus des soubsons que V. A. avoit de sa personne, qu'Elle ne vouloit persevoir combien Elle faissoit pour Luj. Elle [...] d'unne tablette de brasselet de son portrait, [...] a celuj de Monsieur le LandtGrave & fist present de sa grace a ma femme dunne tenture de [...]. Cette suoirée se passa den ces entretiens & que sa Maiesté consulteroit Mons. le Chancelier & mon pere sur ce que V. A. desiroit de voir touchant le Courronement pour se regler [...] volonte de la Roijne, ainsi au premier iour [...] en haures des nouvelles. Le reste des discours touscha les affaires de l'Estat & le iusgement de plusieures personnes, qui j furent deschiff[...]. La scharge que V. A. demendoit pour secretaire lui fust incontinent accorde. Je laisse panser a V. A. si le lendemein je fus assassine de Visites, tellement ausi que ie m'en furiois du logis & il m'estoit impossible que vers le suoir de retourner a la Cour, ou il ne ce passa rien que la mesmme schose du lendemein. Le samedi Sa Maieste fust au Conseil & le dimenche je pris conge d'Elle pour retourner pour quelque iours aus champs, ou je suis asteure Monseigneur & encore pour quelque iours jusques a ce que jaije trouve unne maison a la vile. La cour est bien desolee & plus triste que jamais, par mis les plus grands plaisirs d'icelle on s'ennuit & ce bon chatau qui est toust lugubre semble en portan le deuil avoir banni touste rejouissense. Jl faudra pourtant que j'aye ma part a cette tristesse & voissi que mon purgatoire va recommenser. La Roijne m'a fait la grace de m'honnorer de la scharge de Consellier de guerre, J'en suis trais aise pour eviter la Chancelerie & la Chambre de Comtes, des enfers pour moij. Nous n'avons auqu'unnes nouvelles & jamais les Gazettes n'ont este plus steriles. J'en suis bien content car c'est austant de paine espargnié pour moij, toust ce qve je puis dire en finisant ma lestre c'est Monseigneur que je consellie à V. A. de revenir au plus tost, pour fermer la bousche a baucoup des personnes & couper court aus soubsons & vaines esperenses que Vostre Absense poura donner le premier en lieu ou il importe baucoup qu'on aye bonne opinion de V. A. et le dernier aus maligns. Jl me semble choses commensent a naistre. C'est ma treshumble priere & qu'il plaise a Vostre Altesse de croijre que je suis du plus zele de mon coeur
Monseigneur
Vostre treshumble &
tresobeissant serviteur
MAGNUS GABRIEL DE LA GARDIE.
d'Ekholm le 26 Sept. 1647.
_(David_Beck)_-_Nationalmuseum_-_17258.tif.jpg)
Above: Kristina.
Above: Magnus de la Gardie.
Above: Karl Gustav.
Notes: asteure = à cette heure.
sente = santé.
estent = étant.
dire = dirai.
den = dans.
No comments:
Post a Comment